新作簡評報告 – 測試平台為PS5

《阿凡達：潘朵拉邊境》無論作為2023年尾大作、
單人開放世界動作冒險遊戲、
雙人連線協力遊戲、
Ubisoft 嘅2023年度完結之作都可以話係十分理想！
《阿凡達》當年由著名導演占士·金馬倫當初撰寫劇本開始，
到正式完成特技等工作再到上映長達十多年。
Ubisoft由2017年就正式公佈製作改編遊戲，
但幸好遊戲唔洗製作十多年，
喺2023年12月7日就已經正式推出。

開放世界動作冒險遊戲，
近年好多唔同題材都出過。
Ubisoft自家就有《Far Cry》同《刺客教條》呢兩個系列比較著名，
喺呢方面當然已經經驗十足。
由於遊戲係第一人稱玩法，
所以整體上就會比較似《Far Cry》。
當題材配上曾為全球最賣座電影近十年嘅《阿凡達》，
注目度立即大大提升，
整個遊戲玩法同氣氛相對《Far Cry》亦完全改變。
即使本身有無睇過《阿凡達》都好，
遊戲都完美重現潘朵拉星球嘅動植物同環境，
如果你有睇電影的話，
你會更加享受探索同置身於整個生態當中。

故事方面，
時間線為電影第一集同第二集之間，
當年天空人(即人類)喺潘朵拉期間，
據走咗唔少年幼納美人，
並從小以人類方式教育作為侵佔手段之一。
直到十多年後納美人成功對抗天空人，(即電影第一集故事)
遊戲主角之一等納美人先有機會接觸原本嘅潘朵拉星球，
主線就係玩家以第一身操控主角，
喺潘朵拉星球探索冒險，
認識唔同部落嘅納美人，
並展開戰鬥阻止資源管理局繼續破壞潘朵拉星球。

戰鬥系統方面，
納美人最主要嘅攻擊手段弓箭當然唔少得，
雖然有槍械可以使用，
但呢隻唔係一隻爽快殺敵槍Game，
善用地形潛行打獵同清脆擊殺敵人，
絕對係根據原著嘅首選戰鬥方式。
擊退管理局戰鬥外骨骼時，
利用重弓擊中敵人致命弱點，
再遂一消滅敵軍先係致勝之道。
隨住故事推進，
主角慢慢學習更多納美人嘅先祖技能，
學習騎乘唔同生物，
馴服自己嘅伊卡蘭傲翔潘朵拉天際，
而且仲會有空戰及騎乘戰鬥。
整個遊戲進程同學習系統，
都令玩家融入納美人獨有文化之中。

整體方面，
可以話Ubisoft今次以現代遊戲方式，
完美喺畫面上重現潘朵拉星球喺玩家眼前。
遊戲只計主線至少20小時以上，
選擇唔同困難度所需用時會稍為減少或增加，
玩家可自行選擇唔同難度以自己嘅步伐體驗潘朵拉。
輕鬆自由探索潘朵拉美妙環境，
挑戰高難度過關亦可。
當中有大量探索元素同支線任務，
好多喺電影中出現過嘅動植物亦有登場，
即使無出現過嘅，
都會有圖鑑系統詳細描述，
內容非常有誠意，
玩完整個遊戲起碼有3~40小時遊玩內容。
季票中的額外任務:熟悉回音亦已於首發當日推出，
而當中的故事組合包內容及推出時間亦已釋出，
故事組合包 #1：破空者——將於 2024 年夏季推出，
故事組合包 #2：尖塔的祕密——將於 2024 年秋季推出。
而且遊戲仲有雙人連線系統，
留喺聖誕新年長假期同朋友一齊探索潘朵拉就最好不過。

整體遊戲評分：
遊戲性：⭐️⭐️⭐️⭐️⭐️
故事性：⭐️⭐️⭐️⭐️⭐️
困難度：⭐️⭐️⭐️⭐️⭐️
完整性：⭐️⭐️⭐️⭐️⭐️
耐玩性：⭐️⭐️⭐⭐️⭐️
推薦度：⭐️⭐️⭐️⭐️⭐️
（每項評分最高為五顆⭐️）

#阿凡達 #阿凡達潘朵拉邊境 #Ubisoft #育碧 #Avatar #AvatarFrontiersofPandora #PS5 #Xbox