大家好，又嚟到 閱「毒」報告 嘅時間啊，我係阿Kent。今日我地就會講喺8月25號推出嘅SD Gundam激鬥同盟。Bandai Namco Entertainment 係咪見到有呢個名喺封面嘅遊戲新作就己經好驚呢？（伏伏伏）值唔值得玩嘅話，睇完我地介紹再決定都未遲。

大家有玩開高達遊戲嘅朋友，應該都好耐無見過高達推出Gundam VS系列同 G Gen系列以外嘅全新遊戲。今次呢隻激鬥同盟嘅出現，就己經引起咗唔少高達迷嘅注意，作為一隻全新作品，Bandai就選擇咗SD化呢個一向比較多高達迷受落嘅設定，加上萬用嘅穿越時間線嚟鋪排故事，就推出咗呢隻全新嘅第三身APRG高達新作。

今次激鬥同盟故事講述，玩家因為高達世界嘅歷史出現錯誤而被卷入當中，從而喺一啲受破壞嘅歷史當中修正返做正常嘅故事線。雖然遊戲無推出PVP模式，但就以最多可以3人，線上過關收集機體嘅多人模式為賣點之一，有好多人最初只睇Trailer同介面會以為係SD化咗嘅Gundam VS操作方法遊戲，但如果有一定遊戲年資嘅機迷，操控方面玩落其實好有當年「SD高達Online」嘅影子。

遊戲收錄咗唔少高達作品，裝正式劇場再加入不同亂入就係今次遊戲主線發展，就因為亂入錯誤世界觀，關卡好多都係用返原著特色場景設計，有時就會有啲有趣嘅對話劇情出現，就好似TrunX出現喺機動武鬥傳場景，會話係「神高嘅哥哥」，馬沙因為出現喺多個年代就被話無恥等等，喺呢啲位就見到故事關卡設計係有啲心思。

不過每部作品暫時可用機體都係2～5部內，亦都係偏向人氣比較高嘅主角機，而喺模組上亦制作咗唔少量產機，雖然無得用呢啲量產機，但相信唔少高達迷見到亦己經好高興。機體動作方面同招式動作細節都好好，每部可用機體都有獨立嘅招式嘅動作，不過完全無儲力射擊招式，可變形機體又無得直接變形當移動手段，就變咗係操作方面嘅失色位。

不過缺點就總有啲，最大問題相信好多玩家都會覺得係視角太近而且仲要無得改，導致可視範圍收窄。過場動畫唔少名場面雖然就有製作，但經常就喺莫名其妙嘅位置停止，令到高達迷總係有啲意猶未盡咁。MA Boss戰都算係本作嘅特色，而且戰鬥時表現都唔差，但奇怪嘅係雖然MA係可以Lock唔同部位，但其實遊戲無部位傷害加乘同破壞呢樣野，令到可以Lock唔同位置嘅存在意義不明。另外，我地仲試到遊戲有時會當成功過關但結算時完全無獎勵嘅bug添，呢啲絕對係扣分位。

整體嚟講，遊戲耐玩性唔差，唔洗太肝就可以打到唔同機體，但相對關卡亦未算非常多。而關卡到後期亦有一定難度，至少唔會下下無雙切菜咁悶。遊戲一推出就己經有Playstation, Nintendo Switch, Xbox, Steam多平台發售，但無得跨平台連機就比較可惜，PC版嘅玩家我地就真係唔建議你用Keyboard玩呢隻Game喇。

今次之後，以後我地Game評喺評分時都改咗新嘅評分位令大家更清晰，今次評分詳細如圖～對於Bandai以往製作高達遊戲嘅保守態度，今次算係有啲驚喜位有啲誠意去設計故事。而且Bandai同高達作品當然仲要觀望DLC喇，所以我地就覺得佢值XX分，起碼如果係高達迷嘅你都值得玩下，點都唔似「New Gundam Breaker」「Gundam Versus」呢啲高達遊戲黑歷史。

撰稿：Jackal